LOADING

Type to search

Онцлох

Б.Батчимэг: Дараах тусламж, үйлчилгээг авахад 13А маягт шаардахгүй

Share

13A маягт ямар тохиолдолд шаардлагатай талаар ЭМДЕГ-ын Бодлого төлөвлөлтийн газрын дарга Б.Батчимэг тодруулга өглөө.

Тэрбээр “13A маягт буюу өвчтөн шилжүүлэх журмыг ЭМЯ-наас шинэчлэн гаргасан. Үүнтэй уялдуулан ЭМДЕГ-аас мэдээллийн системд тохируулгууд хийсэн байгаа. Жишээлбэл, өвчний учир амбулаторийн үзлэгт хамрагдах бол 13А маягт шаардлагатай. Харин эрүүл мэндэд нөлөөлж буй хүчин зүйлээ тодорхойлуулах гэж байгаа бол 13А шаардахгүй. Жишээ нь магадалгаа авах, жор бичүүлэх, хараагаа шалгуулах гэх мэт тохиолдолд 13А нэхэхгүй.

Мөн амбулаториор мэс ажилбар хийгдэж байгаа тохиолдолд 13А шаардлагагүй. Жишээлбэл иргэн хатгиа нээлгэх гээд аль нэг эмнэлэг дээр очлоо гэхэд заавал өрхөөс 13А маягт ав гэхгүй.

Түүнчлэн шүд, амны хөндийн тусламж үйлчилгээнд шарддаггүй. Амбулаторийн хяналтын үйлчилгээ гэж бий. Тухайлбал халдвартай, хавдартай өвчтөнд эмч нь өөрөө хэдэн удаа хяналтад хамрагдахыг бичээд өгчхөж байгаа учир 13А шаардахгүй. Харин халдварт бус өвчний үед бол 13А маягт шаарддаг.

Жирэмсэн эмэгтэйчүүдийн хувьд бол эх хүүхдийн ягаан дэвтрээ үзүүлэхэд л болно. Өндөр өртөгт оношилгоо болон өдрийн эмчилгээг амбулаторийн эмчийн заалтаар хийдэг учраас 13А маягт шаардлагагүй байдаг. Жишээлбэл, диализын аппаратад орох иргэд өрхөөсөө 13А маягт авахгүй ээ л гэсэн үг.

Мөн хувийн хэвшлийн эрүүл мэндийн байгууллагад иргэн сайн дураараа очин үйлчлүүлэхэд 13А маягт шаардахгүй. Харин ЭМДЕГ-тай гэрээтэй хувийн хэвшлийн эрүүл мэндийн байгууллагаар үйлчлүүлэхдээ 13А маягтаа авч очоод хөнгөлөлттэй үнээр үйлчлүүлж болно” гэв.

Дараах тусламж, үйлчилгээг авахад 13А маягт шаардахгүй

1. Халдварт өвчний тусламж, үйлчилгээ

2. Шүд, амны хөндийн тусламж, үйлчилгээ

3. Чих, хамар, хоолойн тусламж, үйлчилгээ

4. Хорт хавдар, осол гэмтлийн тусламж, үйлчилгээ

5. Арьс, харшлын тусламж, үйлчилгээ

6. Эрүүл мэндийн байдал болон эрүүл мэндийн байгууллагад хандахад нөлөөлөх хүчин зүйлс

7. Сэтгэц, зан үйлийн эмгэгийн тусламж, үйлчилгээ

8. Уламжлалт анагаах ухааны тусламж, үйлчилгээ

9. Сэргээн засах тусламж, үйлчилгээ

10. Амбулаториор хийгдэх мэс ажилбар

Leave a Comment

Your email address will not be published. Required fields are marked *

error: Content is protected !!