Хүүхдээ харангаа гэрээсээ ажиллана гэдэг таны тэвчээрийг барж магадгүй. Тэгвэл дараах зөвлөмжүүдийг уншаарай.
Тоо томшгүй олон асуултууд, зогсолтгүй замбараагүй байдал, байнга үглүүлэх, эцэс төгсгөлгүй хэрэгцээ… Мэдээж энэ нөхцөл байдлыг цар тахал улам өргөжүүлсэн. Заримдаа ганцаараа өнгөрөөх багахан цаг хугацааг үгүйлэх нь ч бий. Мөн бид гэрээсээ ажиллаж байгаа тул ажилдаа анхаарах, хүүхдүүдээ харах гээд олон ажлыг зэрэг амжуулах шаардлагатай тулгарч байна. Сэтгэл зүйчдийн өгч буй дараах зөвлөгөөг туршаад үзээрэй.
Үл тоомсорлох арга
“Өөрийгөө стресстүүлэлгүйгээр тайвшрах энгийн арга бол үл тоомсорлох явдал юм” гэж LCSW-ийн доктор, Кэтрин Пирлман хэллээ. Таныг залхаасан, анхаарал татсан, эсвэл хүсэлтийнх нь хариуд “үгүй” гэж хэлсний дараа хүүхдийн гаргаж буй зан авирыг үл тоомсорлох аргыг туршаад үзээрэй.
Динамикийг өөрчлөх
“Хүүхдүүд маань ч бас стресст орж, санаа зовдог тул тэдний уур уцаартай байдал нь тайвшрахыг эрэлхийлж буй шинж тэмдэг байж болох юм. Тэд хэдийгээр үймүүлж байсан ч бүх зүйл хэвийн болно, дэргэд нь байж тэднийг хайрлаж, хамгаална гэдгээ мэдрүүлээрэй” гэж “Raising Stress-Proof Kids” номын зохиогч Шелли Дэвидов хэлэв.
Хүүхдийн тэрхүү хайрлуулах, хамгаалуулах хэрэгцээг хангах нь таныг залхааж буй үйлдлийг бууруулж магадгүй гэнэ. 20 минутын турш уралдаант тоглоом тоглох, хамтдаа зурах эсвэл “стресс үүсгэх динамик байдлаас” холдуулах бусад ажлыг хийгээрэй.
Сэтгэл хөдлөлөө анзаарах
Та өөрийн сэтгэл хөдлөлөө анзаарснаар хүүхдүүдийнхээ үйлдэлд илүү зөв хариу үзүүлэх болно гэж сэтгэл судлаач Л. Даниел хэлэв. Ингэхийн тулд өдөрт хэдэн минут зарцуулаад дараах зүйлийг туршаарай.
1. Нүдээ ань
2. Нэг гараа гэдсэн дээрээ, нөгөө гараа зүрхэн дээрээ тавь
3. Зүрхнийхээ цохилт, амьсгал, амьсгагаа анзаараарай
4. Аливаа мэдрэмжийг мэдрэхийн тулд бие махбодоо сайн анзаарах
5. Нүдээ нээгээд, өөрийгөө ямар байгааг мэдэр.
Үүнийг 20 минутын турш хийхийг зөвлөж байна.
Сэгсрэх
Бие махбодийн стрессийн хариу урвал (цусны даралт ихсэх, булчин чангарах) болон бухимдлаар өдөөгдсөн илүүдэл энергийг эсэргүүцэхийн тулд гар, хөлөө сэгсрээрэй. Сонирхолтой нь олон амьтад стрессийн нөлөөг арилгахын тулд өдөрт хэдэн арван удаа биеэ сэгсэрдэг гэнэ.
Уялдаа холбоо
Хэрэв бид өөрсдийгөө тайван байдалд оруулбал энэ нь хүүхдэд ч мөн эерэгээр нөлөөлнө гэж Дэвидов хэлэв.
HeartMath хүрээлэнгээс боловсруулсан энэхүү аргыг туршиж үзээрэй.
1. Анхаарлаа төвлөрүүл
2. 6 секундын турш амьсгалж, 6 секундын турш ердийнхөөс арай удаан, илүү гүнзгий амьсгална.
3. Аливаа зүйлийг эсвэл хэн нэгнийг халамжилж, талархаж байгаагаа мэдрэхийг хичээ. Үүнийг 2 минутын турш хий (та хүүхдүүдээсээ хамт хийхийг хүсч болно).
Дээшээ, доошоо
Доошоо тонгойх нь мэдрэлийн системийг тайвшруулж, тархины цусан хангамжийг нэмэгдүүлж, шинэ санаа төрөхөд тустай. Тонгойх, эвхрэх байрлал, хүүхдийн байрлал /өвдгөө нугалж суугаад гараа урагш сунган духаа газарт хүргэх/, эсвэл хананд хөлөө тулгаж дээш өргөх гэх мэт энгийн йогийн байрлалуудыг санал болгож байна. Тайвшруулах ашиг тусыг нэмэгдүүлэхийн тулд 5-10 удаа гүнзгий амьсгаа аваарай.
Хүүхдүүдтэйгээ хамт амрах
Та энгийн дасгалуудыг хүүхдүүдтэйгээ хамтарч хийж болно. Хүүхдүүдтэйгээ хамт салхинд гарч, гадуур зугаалаарай. Эсвэл өглөө оройдоо хамт сунгалтын дасгал хийж болно.
Нөхцөл байдлыг дахин эргэцүүлээрэй
“Хэтийн төлөв бол хүүхдээ хүмүүжүүлэх хамгийн хүчирхэг хэрэгслийн нэг юм” гэж Кунцман хэлэв.
Сэтгэл судлаач, доктор Айлин Кеннеди-Мур үүнтэй санад нэг бөгөөд хүүхдүүдийнхээ гаргадаг зарим үйлдлүүдийн талаар сөргөөр бодох нь бидний уур хилэнг өдөөж байдаг гэж тэмдэглэжээ. Тиймээс бодлоо цэгцэлж, эерэг бодлыг хэвшүүлээрэй.
Тухайлбал,
• Хүүхэд тань таны тэвчээрийг барсан үед “би дахиж тэвчиж чадахгүй нь” гэхийн оронд “Би үүнийг хийж чадна. Урагшлахын тулд надад яг одоо юу хэрэгтэй байна вэ? ” гэж өөрөөсөө асуу.
- “Би сайн эцэг /эх/ байж чадахгүй байна” гэж бодохын оронд “би өдөр бүр сурч байна, миний хүүхдүүд ч бас адилхан” гэж бодоорой.
• “Тэр намайг хүндэлдэггүй болохоор би ийм зүйл хийж байна!” гэхийн оронд өөр эерэг бодлыг өөртөө бий болго.
• Хүүхэд уур бухимдлыг чинь барах үйлдэл хийх үед “Тэр намайг галзууруулах нь!” гэхийн оронд “Тэр өлссөн эсвэл ядарсан байх” гэх мэтээр шалтгааныг нь хай.
• “Түүнд өөрөөс нь өөр хэн ч хамаагүй!” гэж бодохын оронд “тэд найз нөхөдтэйгээ удаан уулзаагүй болохоор бухимдалтай, уйтгартай байна” гэх мэт нөхцөл байдлыг ойлгох гэж хичээгээрэй. Мөн сөрөг бодлоосоо салаарай.
Хошин шогийн мэдрэмж
Таны хүүхэд аягатай зүйл барьсан, түүнийгээ алдаж асгасан бол та эхлээд хашгирах, орилох гэх мэт рефлекс үзүүлэх нь тодорхой. Харин та үүний оронд инээхийг хичээ. Хэрэв та нөхцөл байдлыг эерэгээр эргүүлж, инээдэмтэй байдлаар илэрхийлж чадвал стрессийг бууруулах болно.
Асуудлыг шийдвэрлэх
Байнгын хүнд хэцүү нөхцөл байдал үүссэн бол асуудлыг шийдвэрлэхэд хүүхдээ ч татан оролцуулаарай. Энэ нь зөвхөн ашигтай санаа гаргах төдийгүй таны санал болгож буй шийдлүүдийн дагуу хүүхдүүд хамтран ажиллах магадлал өндөр. Нөхцөл байдлыг дүрсэлж, хүүхдээсээ “Үүнийг шийдэхийн тулд бид юу хийж чадах вэ?” гэж асуу.
Бусадтай харилцах
Вакуум орчинд хязгаарлагдсан мэт мэдрэмжээсээ салахын тулд найзуудтайгаа харилцаа холбоотой байгаарай. Нөхцөл байдлын талаар хошигнож, хууч хөөрөх нь танд сайнаар нөлөөлнө.
Магнигаар баялаг хоол хүнс идээрэй
Сэтгэл судлаач Даниелын хэлснээр, стресстэй үед энэхүү амин чухал эрдэс бодис дутагддаг. Стресстэх нь уг эрдэс бодис хамгийн их хэрэгцээтэй үе байдаг аж. Магни датагдсанаар тайван байх, аливаа зүйлд тайвнаар хариу үзүүлэхэд хүндрэл үүсгэдэг аж. Бууцай, кейл зэрэг ногоон навчит ургамал, гадил жимс, авокадо, хар шоколадтай смүүти зэргийг түлхүү хэрэглээрэй.
Эх сурвалж: Healthline